15 September 2005

Bata, bata ... pa'no ka ginawa?

Mga ilang araw na ang nakakaraan nang kami ng mga kaopisina ko ay nagpunta ng National Bookstore upang bumili ng borloloy ng regalo para sa mga kliyente namin.

Sale doon kung kaya't napalingon-lingon ako at baka makakita ako ng libro na maaari kong mabili. At nabaling ng pansin ko ang librong ito ni Lualhati Bautista, ang "Bata, bata ... pa'no ka ginawa?"

Sa halagang 88 pesos less 20% ay ayos na ayos sa aking numinipis na wallet. Nang nakita ng mga kasama ko ang librong hawak-hawak ko ay natuwa sila.

"Uy! Ginawan namin ng book report yan!"
"May pelikula rin yan! Ginawan naman namin ng movie report!"

Nagtataka ako. Alam ko na isina-pelikula ang librong ito pero di ko alam na sikat rin pala ito.

"Eh kasi sir, wala na kayo sa school noon lumabas 'yang libro."

Ayos. Binisto pa ang edad ko. Teka, 1983 ito nilathala ah. Matagal na akong tapos sa Nancy Drew / Hardy Boys phase. Hmmm... bakit kaya di ko ito nabasa noon?

At ang aking feedback sa lathalang ito? Da best!

Nakakatuwa ang pagkakasulat! May konting murahan portion dito at doon, pero overall ay solid ang kwento. Tungkol ito sa isang pamilya na di ordinaryo ang katayuan, sapagka't ang dalawang magkapatid ay magka-iba ng ama. Nagiging komplikado ang sitwasyon sapagka't gustong maging totoo ang ina nilang si Lea sa kanila, kaya't namulat ang mga bata sa katotohanang iba sila.

Bagama't medyo taboo pa ang paksang ito sapagka't conservative ang Pinoy (o maling pag-aakala na ito?) ay akmang-akma ang tema sa panahong ito. Ang komplikasyon ng pag-adjust ng schedule sa pamilya at sa trabaho, mga taong hindi mo lahat mapaliligaya, mga self-righteous, may masayang araw, at meron rin namang hindi.

Nasa ika-dalawampung kabanata na ako. Malamang ay matapos ko na ito pagdating ng weekend. Kung di nyo pa nababasa ito ay bumili na agad ng kopya! Awardee ito ng Palanca Memorial Awards for Literature!
Related Posts Plugin for WordPress, Blogger...